નડિયાદઃ નશાયુક્ત સિરપ પીવાથી 5 લોકોનાં મોત, ભાજપ નેતા સહિત ત્રણની અટકાયત

Published By
gujaratpost.in
2023-11-30 16:09:35

ખેડાઃ મિથાઈલ આલ્કોહોલ યુક્ત કફ સીરપ પીવાથી 5 લોકોનાં મોત થતા તંત્ર દોડતું થયું છે. જેમાં બિલોદરા ગામમાં આ આયુર્વેદ કફ સિરપ વેચનાર કિશોર સોઢાની અટકાયત કરીને પોલીસ દ્રારા પૂછપરછ કરવામાં આવી રહી છે.

ખેડા પોલીસ, અમદાવાદ ગ્રામ્ય પોલીસ અને સ્ટેટ મોનિટરિંગ સેલ દ્વારા 5 લોકોનાં મોતની તપાસ કરવામાં આવી રહી છે.આ ઘટનામાં સંડોવાયેલા લોકોની પૂછપરછ કરવામાં આવી રહી છે. પ્રાથમિક માહિતી અનુસાર, કિશોર નામનો વ્યક્તિ આયુર્વેદિક દવા (કફ સિરપ) વેચતો હતો.

કિશોરે 50 થી 55 લોકોને આ દવા વેચી હતી. આ દવા કફ સિરપ અથવા ટોનિક જેવી છે. દવા પીધા બાદ આ લોકોનાં મોત થયા છે. કિશોરે દવા કોની પાસેથી મેળવી તે અંગે પૂછપરછ હાથ ધરવામાં આવી છે. બિલોદરા ગામના ત્રણ વ્યક્તિઓના મોત થયા છે. જેમાં અશોકભાઇ, નટુભાઇ અને અર્જુનભાઇનો સમાવેશ થાય છે.

ખેડાના એસપી રાજેશ ગઢિયાએ જણાવ્યુ કે, નડિયાદના બિલોદરા અને મહુધાના બગડુ ગામમાં કેટલાક લોકોના મોત નીપજ્યાં છે. આ અંગેની માહિતી મળતા તાત્કાલિક પોલીસે તપાસ હાથ ધરી હતી. દરમિયાન માહિતી મળી હતી કે, મિતેષ ચૌહાણ બગડું ગામમાં એક પ્રસંગમાં ગયા હતા. જ્યાં જમીને તેઓ સૂતા હતા. બાદમાં તેમને છાતીમાં દુખાવો થતા તેમને મહેમદાવાદ હોસ્પિટલ લઇ જતી વખથે તેમનું મોત થયું હતુ. તેમની અંતિમ વિધિમાં તેમના જીજાજી અલ્પેશ સોઢાને પણ છાતીમાં દુખાવો થયો હતો. જેથી તેમને ત્યાંની ખાનગી હોસ્પિટલમાં દાખલ કરવામાં આવ્યાં હતા. તેમનું પણ સારવાર દરમિયાન મોત થયું હતુ. પરિવારજનોના જણાવ્યાં પ્રમાણે તેઓ કેન્સરથી પીડાતા હતા. પરંતુ આ સિરપ પીધા બાદ તેમનું મોત થઇ ગયું છે.

નોંધનિય છે કે ખેડા LCBએ બિલોદરાના વેપારી કિશોર સોઢા, કિશોરના ભાઈ અને નડિયાદના યોગેશ સિંધીની અટકાયત કરી છે. કિશોર સોઢા ઉર્ફે કિશન ભાજપનો નેતા છે, તે નડિયાદ તાલુકા કોષાધ્યક્ષની જવાબદારી ધરાવે છે અને તેને જ પોતના કિરણા સ્ટોરમાંથી આ સિરપ વેચી હતી.