પ્રથમ દિવસે બમ્પર કમાણી કર્યાં પછી એનિમલના નિર્માતાને લાગી શકે છે ઝટકો, HD પ્રિન્ટમાં ઓનલાઈન લીક થઈ ફિલ્મ

Published By
2023-12-02 15:09:35

ફિલ્મે એક જ દિવસમાં કરી 116 કરોડ રૂપિયાની કમાણી

મુંબઇઃ બોલિવૂડ એક્ટર રણબીર કપૂરની 'એનિમલ' વર્ષ 2023ની સૌથી વધુ રાહ જોવાનારી ફિલ્મોમાંની એક હતી, હવે શુક્રવારે સિનેમાઘરોમાં આ ફિલ્મ રિલીઝ થઈ હતી. આ ફિલ્મે રિલીઝ થતાની સાથે જ ધૂમ મચાવી દીધી છે. પ્રથમ દિવસે 'એનિમલ' જોવા માટે થિયેટરોમાં દર્શકોની ભીડ જોવા મળી હતી. રણબીરનું હિંસક પાત્ર અને ભયાનક વિલન બોબી દેઓલ સાથેની સ્પર્ધા લોકોને સંપૂર્ણ મનોરંજન આપી રહી છે. ફિલ્મે પહેલા દિવસે બોક્સ ઓફિસ પર શાનદાર કલેક્શન પણ કર્યું છે. પરંતુ આ દરમિયાન ફિલ્મને લઈને ચિંતાજનક સમાચાર સામે આવ્યા છે.

એચડી પ્રિન્ટમાં એનિમલ ઓનલાઈન લીક થઇ

રિપોર્ટ અનુસાર રિલીઝના 24 કલાકથી પણ ઓછા સમયમાં રણબીર કપૂરની ફિલ્મ 'એનિમલ' ફૂલ HD પ્રિન્ટમાં ઓનલાઈન લીક થઈ ગઈ છે. આવી સ્થિતિમાં તેની કમાણી પર અસર થવાની સંભાવના છે. સંદીપ રેડ્ડી વાંગા દ્વારા નિર્દેશિત આ ફિલ્મ ટેલિગ્રામ, તમિલરોકર્સ, ફિલ્મઝિલા, ઇબોમ્મા મૂવીરુલ્ઝ, તમિલએમવી જેવી ટોરેન્ટ વેબસાઇટ્સ પર મફત ડાઉનલોડ માટે ઉપલબ્ધ છે. એન્ટરટેઈનમેન્ટ પોર્ટલનો દાવો છે કે આ ફિલ્મ રેગ્યુલર ફોરવર્ડની જેમ વોટ્સએપ પર પણ શેર કરવામાં આવી રહી છે. આવી સ્થિતિમાં શક્ય છે કે તેના કારણે રણબીર કપૂરની ફિલ્મની કમાણી ઘટી શકે છે.

એનિમલમાં રણબીર કપૂર સિવાય બોબી દેઓલ, રશ્મિકા મંદાના, અનિલ કપૂર, શક્તિ કપૂર, સુરેશ ઓબેરોય, પ્રેમ ચોપરા અને તૃપ્તિ ડિમરી પણ મુખ્ય ભૂમિકામાં છે. આ ફિલ્મનું નિર્દેશન સંદીપ રેડ્ડી વાંગાએ કર્યું છે, જેઓ 'કબીર સિંહ' અને 'અર્જુન રેડ્ડી'ના નિર્દેશન માટે જાણીતા છે. ભૂષણ કુમાર અને કૃષ્ણ કુમારની ટી-સિરીઝ, મુરાદ ખેતાનીના સિને1 સ્ટુડિયો અને પ્રણય રેડ્ડી વાંગાના ભદ્રકાલી પિક્ચર્સ દ્વારા નિર્મિત 'એનિમલ'ને ચાહકો તરફથી ઘણો પ્રેમ મળી રહ્યો છે.