રાજ્યમાં ફરીથી ચોમાસાએ જમાવટ કરી, મોરવાહડફમાં 10.25 ઈંચ વરસાદ ખાબક્યો, નર્મદાની જળસપાટી વધી

Published By
gujaratpost.in
2023-09-17 11:06:54

- અમદાવાદમાં રાતથી વરસાદની જમાવટ

- મુખ્યમંત્રીએ સરદાર સરોવર ડેમની સપાટી ઐતિહાસિક સ્તરે પહોંચતા વધામણાં કર્યાં

- નર્મદાના પાણી ભરૂચમાં પ્રવેશ્યાં, 600થી વધુ લોકોનું રેસ્ક્યૂ

અમદાવાદઃ રાજ્યમાં ચોમાસાએ જમાવટ કરી છે. ગઇકાલથી જ રાજ્યના વિવિધ ભાગોમાં વરસાદ છે. અમદાવાદમાં પણ ગત રાતથી ઝરમર વરસાદ વરસી રહ્યો છે. છેલ્લા 24 કલાકમાં મોરવાહડફમાં 10.25 ઈંચ, છોટા ઉદેપુરમાં 10 ઈંચ વરસાદ ખાબક્યો છે. મધ્યપ્રદેશમાં સારા વરસાદને કારણે સરદાર સરોવર ડેમની જળસપાટી વધતા નર્મદા નદીમાં પાણી છોડવામાં આવી રહ્યું છે. જેના કારણે ભરૂચ, અંકલેશ્વર સહિતના કાંઠાના શહેરો, ગામોમાં જળસપાટી વધી છે.

વરસાદને કારણે વડોદરા નજીક ડભોઇ - ચાંદોદ નજીકથી પસાર થઇ રહેલી નર્મદા નદીના પાણી ગામોમાં ઘૂસવા લાગ્યા છે.અહીં નર્મદા નદી બે કાંઠે વહી રહી છે. ચાંદોદના મલ્હારરાવ ઘાટના 108 પગથિયાં પાણીમાં ગરકાવ થઈ ગયા છે, સાથે જ ચાંદોદના બજારોમાં પાણી ભરાયા છે. ઓરસંગ નદી ચાંદોદ કરનાળી નજીક એક થતી હોય જેને લઈને ચાંદોદ, કરનાળી ગામોમાં વિકટ સ્થિતિ ઉભી થઈ શકે છે.

ભરૂચના ગોલ્ડન બ્રિજ પર નર્મદા નદીની સપાટી 31 ફૂટને પાર કરી ગઇ છે. નર્મદાના પાણી ભરૂચ શહેરમાં પ્રવેશવાના શરૂ થઈ ગયા છે. 600થી વધુ લોકોને સલામત સ્થળે ખસેડવામાં આવ્યાં છે.

સરદાર સરોવર નર્મદા ડેમ તેની ઐતિહાસિક જળ સપાટીએ છલકાતાં એકતાનગર ખાતે સીએમ ભૂપેન્દ્ર પટેલે નર્મદા મૈયાના નીરના વધામણા કર્યાં. નર્મદાના મૈયાની કૃપા ગુજરાત પર સદૈવ વરસતી રહે અને સૌના જીવનમાં સુખ, શાંતિ અને સમૃદ્ધિ વરસાવે તેવી પ્રાર્થના કરી હતી. એક્સ પર લખ્યું, માનનીય વડાપ્રધાન નરેન્દ્રભાઈ મોદીએ વડાપ્રધાન તરીકે સુકાન સંભાળ્યાના માત્ર 17 દિવસની અંદર સરદાર સરોવર ડેમ પર દરવાજા લગાવવાની મંજૂરી આપી હતી, તેના પરિણામે આજે ડેમનો પૂર્ણ ક્ષમતાએ ઉપયોગ થઈ રહ્યો છે અને નર્મદા મૈયાના જળ ઉત્તર ગુજરાત, સૌરાષ્ટ્ર અને કચ્છ સહિતના વિસ્તારોને નવપલ્લવિત કરી રહ્યાં છે.

સરદાર સરોવર નર્મદા ડેમ તેની ઐતિહાસિક જળ સપાટીએ છલકાતાં એકતાનગર ખાતે નર્મદા મૈયાના નીરના વધામણા કર્યા. નર્મદાના મૈયાની કૃપા ગુજરાત પર સદૈવ વરસતી રહે અને સૌના જીવનમાં સુખ, શાંતિ અને સમૃદ્ધિ વરસાવે તેવી પ્રાર્થના કરી.

માનનીય વડાપ્રધાન શ્રી નરેન્દ્રભાઈ મોદીએ વડાપ્રધાન તરીકે સુકાન… pic.twitter.com/PwXNAveV7v
— Bhupendra Patel (@Bhupendrapbjp) September 17, 2023