સુરતઃ કામરેજમાં એમ્બ્રોઇડરીનું મશીન ફેરવતી વખતે કરંટ લાગતા બે કારીગરોનાં મોત

Published By
gujaratpost.in
2023-04-23 16:23:01

સુરતઃ કામરેજમાં આવેલા અમૃત ઉદ્યોગનગરમાં એમ્બ્રોઇડરીના કારખાનામાં બે કારીગરોને કરંટ લાગતા તેમનું મોત થયું છે. એમ્બ્રોઇડરી મશીનના કાપડની ફેરબદલી માટે મશીનના એક ભાગને બારીની બહાર કાઢવા જતા મશીનનો એક ભાગ હાઈટેન્શનની લાઈનને અડી જતા બેઉ કારીગરને કરંટ લાગ્યો હતો. કરંટ લાગતા જ કારીગર કારખાનામાં ઢળી પડ્યા હતા. બંન્નેને સારવાર અર્થે હોસ્પિટલ લઇ જવાતા ફરજ પરના તબીબે મૃત જાહેર કર્યા હતા. કામરેજ પોલીસે અકસ્માતે મોતનો ગુનો નોંધીને કાયદેસરની કાર્યવાહી હાથ ધરી છે.

સુરતના કામરેજ ખોલવડ ગામમાં આવેલા અમૃત ઉદ્યોગનગરમાં રાજેશભાઈ સવજીભાઈ વરડિયાનું એમ્બ્રોડરીનું કારખાનું આવેલું છે. મૂળ યુપીના વતની ભગવાનસિંહ રાજપૂત (ઉં.વ-27) અને સતીષકુમાર રાજપૂત (ઉં.વ-28) નામના બે કારીગર બીજા માળે એમ્બ્રોડરીના મશીન ઉપર કામ કરતા હતા. ભગવાનસિંહ અને સતીષકુમારે મશીનનો એક છેડો બારીની બહાર કાઢતા બારીની બહાર વીજ પુરવઠાની હાઈટેન્શનની લાઈનને અડી ગયો હતો. જેથી બન્ને કારીગરોને જોરદાર કરંટ લાગતા મોત થયું હતું.