મૂળ ગુજરાતના બિલ્ડરની મુબંઇમાં ગોળી મારીને કરાઇ હત્યા, પાટીદાર સમાજમાં ભારે રોષ

Published By
gujaratpost.in
2023-03-16 15:43:23

મુંબઇઃ નેરુલ વિસ્તારમાં કાર લઈને જઈ રહેલા રિયલ એસ્ટેટ ગ્રુપ ઇમ્પેરિયાના માલિક સવજીભાઇ પટેલની કાર રોકીને અજાણ્યા હુમલાખોરોએ તેમના પર ગોળીઓ વરસાવી હતી. મૂળ રાપરના રહેવાસી અને હાલ નવી મુંબઈ ખાતે રહેતા સવજીભાઇ પટેલ (ઉં.વ 65)ની ગોળી મારીને હત્યા કરાઇ છે. પાટીદાર અગ્રણીની હત્યા થતાં પાટીદાર સમાજમાં રોષ જોવા મળી રહ્યો છે. હાલ આ મામલે મુંબઈ પોલીસે તપાસ હાથ ધરી છે.

મૂળ કચ્છના રાપર તાલુકાના સાંય ગામના રહેવાસી અને હાલ મુંબઈના નેરુલ ખાતે રહેતા જાણીતા બિલ્ડર સવજીભાઇ પટેલ ગઈકાલે સાંજે 5.30થી 6.00 વાગ્યાની આસપાસ નેરુલ વિસ્તારમાં કાર લઈને પસાર થઇ રહ્યાં હતા. દરમિયાન મોટર સાયકલ પર આવેલા 2 શખ્સોએ તેમની કારને અટકાવીને ગોળીઓ ધરબી દીધી હતી. તેમને તાત્કાલિક બેલાપુરની એક હોસ્પિટલમાં લઈ જવામાં આવ્યાં હતા, જ્યાં ડોક્ટરોએ તેમને મૃત જાહેર કર્યાં હતા, હત્યા પાછળનું કારણ હજુ જાણી શકાયું નથી. પોલીસે ગુનાના સ્થળે જઇને તપાસ શરૂ કરી છે.

નવી મુંબઈના જાણીતા બિલ્ડર સવજીભાઇ પટેલ બેલાપુરમાં પોતાની હેડ ઓફિસ ધરાવે છે, ઇમ્પેરિયા ગ્રુપ હાલમાં નેરુલ એમઆઇડીસી, પનવેલ અને રસયાનીમાં અનેક રિયલ એસ્ટેટ પ્રોજેક્ટ્સ ચલાવી રહ્યું છે, મુંબઈ પોલીસે હત્યારાઓની શોધખોળ શરૂ કરી છે.