મોરબી IT Raid અપડેટ: રૂ.11 કરોડથી વધુની રોકડ, રૂ.5 કરોડની જ્વેલરી જપ્ત કરવામાં આવી

Published By dilip patel
2025-09-18 16:53:27

રૂપિયા 250 કરોડથી વધુના બેનામી હિસાબો મળ્યાં

પ્રથમ દિવસે ત્રણ કરોડ રૂપિયા કેશ મળ્યાં હતા, બીજા દિવસે પણ કરોડોની રોકડ મળી

ડિજિટલ ડેટા મળ્યાં બાદ કરચોરીનો સાચો આંકડો સામે આવશે

રાજકોટઃ મોરબીમાં આવકવેરા વિભાગે મોટી કાર્યવાહી કરતાં રૂ. 250 કરોડથી વધુના બેનામી હિસાબો શોધી કાઢ્યાં છે. આ દરોડામાં રૂ. 11 કરોડથી વધુની રોકડ અને રૂ. 5 કરોડની જ્વેલરી જપ્ત કરવામાં આવી છે. આ ઉપરાંત આઇટી વિભાગે 32 બેંક ખાતા સીલ કર્યા છે.

મંગળવારે વહેલી સવારે 5 વાગ્યે આવકવેરા વિભાગની 40 ટીમોએ મોરબીના ચાર મોટા ગ્રુપો પર દરોડા પાડ્યાં હતા. આ ગ્રુપમાં લેવીસી સિરામિક, મેટ્રો સિરામિક, ઇડન ગ્રુપ અને મોર્ડન હોમ પ્લાન ગ્રુપનો સમાવેશ થાય છે. છેલ્લા બે દિવસથી આ ગ્રુપોના માલિકોનાં ઘર, ઓફિસ અને કારખાનાઓમાં તપાસ ચાલી રહી છે. હાલમાં ડિજિટલ ડેટાની તપાસ ચાલુ છે, સર્ચ ઓપરેશન હજુ પણ ચાલી રહ્યું છે, જેથી બેનામી સંપત્તિનો આંકડો વધી શકે છે.

રાજકોટ ઈન્વેસ્ટિગેશન વિંગના જોઇન્ટ કમિશનરના નૈતૃત્વમાં સર્ચ ઓપરેશન ચાલી રહ્યું છે. મહિનાઓની સઘન તપાસ બાદ કરચોરી પકડવામાં સફળતા મળી છે. અત્યાર સુધીમાં કરોડો રૂપિયાના બિનહિસાબી વ્યવહારોની સાથે ગોલ્ડ, ડાયમંડ જ્વેલરી આઈટી ટીમને મળી છે. આઈટીની કાર્યવાહીથી કન્સ્ટ્રક્શન, સિરામિક, કોટન સાથે સંકળાયેલા ગ્રુપોમાં ફફડાટ ફેલાયો છે.