ગુજરાતને મળી વધુ એક વંદે ભારત ટ્રેનની ભેટ, પીએમ મોદીએ બતાવી લીલી ઝંડી- Gujarat Post

Published By
gujaratpost.in
2023-09-24 13:04:32

નવી દિલ્હીઃ વડાપ્રધાન નરેન્દ્ર મોદીએ રવિવારે 11 રાજ્યોમાં 9 વંદે ભારત ટ્રેનોને લીલી ઝંડી બતાવી હતી. આ વંદે ભારત ટ્રેનો દ્વારા આ તમામ રાજ્યોમાં ન માત્ર મુસાફરીનો સમય ઘટશે પરંતુ કનેક્ટિવિટી પણ વધશે. મોદીએ વીડિયો કોન્ફરન્સિંગ દ્વારા તમામ વંદે ભારત ટ્રેનોને લીલી ઝંડી બતાવી હતી. વંદે ભારત ટ્રેનો પહેલાથી જ દેશભરમાં ઘણા રૂટ પર દોડી રહી છે. આવી સ્થિતિમાં આ ટ્રેનોની સાથે વંદે ભારત ટ્રેનોનો કાફલો પણ મોટો થવા જઈ રહ્યો છે.

આ 9 વંદે ભારત એક્સપ્રેસ ટ્રેન 11 રાજ્યોમાં દોડવા જઈ રહી છે. આ રાજ્યોમાં રાજસ્થાન, તમિલનાડુ, તેલંગાણા, આંધ્રપ્રદેશ, કર્ણાટક, બિહાર, પશ્ચિમ બંગાળ, કેરળ, ઓડિશા, ઝારખંડ અને ગુજરાતનો સમાવેશ થાય છે. વંદે ભારત ટ્રેન દ્વારા આ રાજ્યોમાં કનેક્ટિવિટી સુધરશે. આ પ્રસંગે પીએમ મોદીએ લોકોને સંબોધિત કર્યાં હતા. આ 11 રાજ્યોના રાજ્યપાલો, મુખ્યમંત્રીઓ અને અન્ય ઉચ્ચ અધિકારીઓ વંદે ભારત ટ્રેનના લોન્ચિંગ સમયે હાજર રહ્યાં હતા. જેમાં રેલવે મંત્રી અશ્વિની વૈષ્ણવે પણ ભાગ લીધો હતો.

ટ્રેન નંબર 22925 અમદાવાદ-જામનગર વંદે ભારત સુપરફાસ્ટ એક્સપ્રેસનું નિયમિત સંચાલન 25 સપ્ટેમ્બર, 2023થી શરૂ થશે. આ ટ્રેન અઠવાડિયામાં 6 દિવસ ચાલશે અને મંગળવારે નહીં ચાલે. આ ટ્રેન અમદાવાદથી સાંજે 5.55 કલાકે ઉપડશે અને તે જ દિવસે રાત્રે 10.35 કલાકે જામનગર પહોંચશે. તેવી જ રીતે ટ્રેન નંબર 22926 જામનગર-અમદાવાદ વંદે ભારત સુપરફાસ્ટ એક્સપ્રેસનું નિયમિત સંચાલન 26 સપ્ટેમ્બર, 2023થી શરૂ થશે. આ ટ્રેન જામનગરથી સવારે 05.30 કલાકે ઉપડશે અને તે જ દિવસે 10.10 કલાકે અમદાવાદ પહોંચશે. આ ટ્રેન અઠવાડિયામાં 6 દિવસ ચાલશે અને બુધવારે નહીં ચાલે. આ ટ્રેન બંને દિશામાં સાબરમતી, સાણંદ, વિરમગામ, સુરેન્દ્રનગર, વાંકાનેર અને રાજકોટ સ્ટેશનો પર ઉભી રહેશે. આ ટ્રેનમાં એસી ચેર કાર અને એક્ઝિક્યુટિવ ચેર કાર કોચ છે.