Thu,21 May 2026,4:36 am
Print
header

સ્થાનિક સ્વરાજ્યની ચૂંટણીઃ મતદાન શરૂ થતાની સાથે જ કેટલીક બેઠકો પર EVM ખોટકાયાની ફરિયાદો

  • Published By Panna Patel
  • 2026-04-26 09:34:07
  • /

અમદાવાદઃ સ્થાનિક સ્વરાજ્યની ચૂંટણી માટે આજે મતદાન શરૂ થઇ ગયું છે. 15 મહાનગરપાલિકાઓ, 84 નગરપાલિકાઓ, 34 જિલ્લા પંચાયતો તથા 260 તાલુકાઓ પંચાયતની ચૂંટણીનું આજે મતદાન છે. આ ચૂંટણીમાં 2027માં યોજાનારી ગુજરાત વિધાનસભા ચૂંટણીના પરિણામોનો પાયો નખાઈ જશે તેવું મનાય છે. પાલિકા પંચાયતની કુલ 9268 બેઠકો પર 2551 ઉમેદવારો ચૂંટણી મેદાને છે. ત્યારે જનપ્રતિનિધિને ચૂંટવા માટે કુલ 4.02 કરોડ મતદારો તેમના અધિકારનો ઉપયોગ કરશે.  

સુરતમાં સ્થાનિક સ્વરાજ્યની ચૂંટણીના મતદાન દરમિયાન વોર્ડ નંબર 21ના બુથ નંબર 88 પર ટેકનિકલ ખામીને કારણે EVM મશીન અચાનક બંધ પડી ગયું હતું. મશીન ખોટકાવવાને લીધે મતદાન પ્રક્રિયા અટકી ગઈ હતી. જો કે, ઘટનાની જાણ થતા જ ચૂંટણી તંત્રના અધિકારીઓ દોડતા થયા હતા અને અન્ય EVM મશીનની વૈકલ્પિક વ્યવસ્થા કરી મતદાન પ્રક્રિયા ફરીથી શરૂ કરાવવાની તજવીજ હાથ ધરી હતી.

બનાસકાંઠાના અમીરગઢમાં ઈવીએમમાં ગરબડના અહેવાલ સામે આવ્યાં છે. વડોદરાના માંજલપુરમાં અંબે સ્કૂલમાં મતદાન મથકે ઈવીએમ ખોટકાતા અધિકારીઓમાં દોડધામ મચી ગઇ હતી. જામનગરમાં ઈવીએમ ખોટકાતા એક કલાક મોડું મતદાન શરૂ થયું હતું.

પંચમહાલ જિલ્લામાં મોરવા હડફના જૂના વાલૈયા મતદાન મથક પર ચૂંટણી પ્રક્રિયા દરમિયાન ઇવીએમ બંધ પડી ગયું હતું. ટેક્નિકલ ખામીના કારણે અહીં હજી સુધી મતદાન શરૂ થઈ શક્યું નથી, ટેક્નિકલ ટીમ સ્થળે પહોંચી ગઈ છે અને ખામી દૂર કરીને મતદાન પ્રક્રિયા વહેલી તકે શરૂ થાય તે માટે કામગીરી હાથ ધરવામાં આવી રહી છે.

ભરૂચમાં ચાલુ મતદાને લાઇટ જતાં મુશ્કેલી ઉભી થઇ હતી. ગોધરામાં એક મતદાન મથકે આગ લાગવાથી અફરાતફરીનો માહોલ સર્જાયો હતો, પરંતુ સદભાગ્યે કોઈ જાનહાનિ થઈ નથી. આણંદમાં એક ઉમેદવાર પર થયેલા હુમલાએ રાજકીય માહોલને તંગ બનાવ્યો છે.

https://www.gujaratpost.in/news/aravalli-lovers-punishment-gujaratpost-news-gujarati-samachar

Watch

Watch