Subscribe Now For Gujarat Post

Whatsapp
Sat,14 March 2026,1:16 am
Print
header

એક પિતાની અરજી પર ગુજરાત હાઇકોર્ટનો મોટો ચૂકાદો, 18 વર્ષની યુવતીએ પોતાની પસંદગીથી લગ્ન કરવાનો પુરો અધિકાર છે

  • Published By
  • 2026-02-22 09:42:43
    • /

અમદાવાદઃ ગુજરાત હાઈકોર્ટે પુત્રીનો કબ્જો પાછો મેળવવા માટે પિતા દ્વારા દાખલ કરવામાં આવેલી 'હેબિયસ કોર્પસ' અરજીને ફગાવી દીધી છે. હાઈકોર્ટે તેના આદેશમાં અવલોકન કર્યું હતું કે, 18 વર્ષની પુત્રીએ તેની પોતાની સ્વતંત્ર ઇચ્છાથી લગ્ન કર્યા છે અને કાયદેસર રીતે તેને પોતાનો જીવનસાથી પસંદ કરવાનો સંપૂર્ણ અધિકાર છે.

અમદાવાદના રહેવાસી એક પિતાએ હાઈકોર્ટમાં હેબિયસ કોર્પસ અરજી દાખલ કરીને આક્ષેપ કર્યો હતો કે, તેમની પુત્રીને એક શખ્સ દ્વારા ગેરકાયદેસર રીતે ગોંધી રાખવામાં આવી છે અને અટકાયતમાં લેવામાં આવી છે. ઉલ્લેખનીય છે કે, અરજદારની પુત્રીએ પરિવારની મરજી વિરુદ્ધ જઈને તે વ્યક્તિ સાથે લગ્ન કર્યા હતા.

જસ્ટિસ એન.એસ. સંજય ગૌડા અને જસ્ટિસ ડી.એમ. વ્યાસની ખંડપીઠે મૌખિક આદેશમાં નોંધ્યું હતું કે, પોલીસે અરજદારની પુત્રીને સુરક્ષિત રીતે કોર્ટ સમક્ષ હાજર કરી હતી. કોર્ટ સાથેની વાતચીત દરમિયાન યુવતીએ સ્પષ્ટપણે જણાવ્યું હતું કે તેણે તેની સ્વતંત્ર ઈચ્છાથી લગ્ન કર્યા છે. તેણીએ કોર્ટને ખાતરી આપી હતી કે લગ્ન માટે તેના પર કોઈ દબાણ કે જબરદસ્તી કરવામાં આવી નથી.

કોર્ટે નોંધ્યું કે,  પિતાએ પોતે જ અરજી સાથે લગ્ન નોંધણીનું પ્રમાણપત્ર જોડ્યું હતું, જે સાબિત કરે છે કે લગ્ન કાયદેસર રીતે થયા છે. ખંડપીઠે વધુમાં અવલોકન કર્યું કે અરજદાર, તેમની પત્ની અને પુત્રી સાથે વાત કર્યા પછી સ્પષ્ટ થયું કે તેઓ તેમના મતભેદો ઉકેલી શક્યા નથી અને માતા-પિતા તેમની પુત્રીને માફ કરી શક્યા નથી. જો કે, પુત્રીએ મક્કમતાથી જણાવ્યું હતું કે 18 વર્ષની થતા જ તેણે પોતાની પસંદગીથી લગ્ન કર્યા છે અને તે તેના પતિ સાથે રહેવા માંગે છે.

પિતાની અરજી ફગાવી દેતા કોર્ટે અંતમાં જણાવ્યું હતું કે, દીકરી 18 વર્ષથી વધુ ઉંમરની છે અને તેણે પોતાનો જીવનસાથી પસંદ કરવા અને પરિણીત જીવન શરૂ કરવા માટેની કાયદેસરની વય પ્રાપ્ત કરી લીધી છે.

https://www.gujaratpost.in/news/aravalli-lovers-punishment-gujaratpost-news-gujarati-samachar

Watch

Advertisement

Watch

Quick Link

Copyright © 2026 Gujarat Post News.