FACT CHECK: નિહંગ જૂથ અને પોલીસ વચ્ચેની અથડામણનો આ વીડિયો CJP ના વિરોધ પ્રદર્શન સાથે સંબંધિત નથી

FACT CHECK: નવી દિલ્હીના જંતર મંતરના રોધ પ્રદર્શનોને લગતા ભ્રામક વીડિયો સોશિયલ મીડિયા પર સતત વાયરલ થઈ રહ્યા છે. તેમાં એક એવી ક્લિપ પણ શેર કરવામાં આવી રહી છે જેમાં લોકોનું ટોળું તલવારો લહેરાવતું જોવા મળે છે અને દાવો કરવામાં આવે છે કે આ દ્રશ્યો દિલ્હીમાં ચાલી રહેલા વિરોધ પ્રદર્શનોના છે. જો કે, આ દાવો ખોટો છે અને વાસ્તવમાં આ વીડિયો ઉત્તરાખંડનો છે, જ્યાં નિહંગ શીખો સાથેના વિવાદ બાદ હિમાચલ પ્રદેશના શીખ સમુદાયના લોકો ત્યાં પહોંચ્યા હતા.

19 જુલાઈ, 2026 ના રોજ ફેસબુક પર શેર કરવામાં આવેલી એક પોસ્ટના કેપ્શનમાં લખ્યું છે, દિલ્હીના જંતર- મંતર ખાતે વિરોધ પ્રદર્શન કરી રહેલા વિદ્યાર્થીઓના સમર્થનમાં નિહંગ શીખો સહિતના અનેક જૂથો આવી પહોંચ્યા છે. પોસ્ટ સાથેના નવ સેકન્ડના વીડિયોમાં કેટલાક લોકો હાથમાં તલવારો લઈને આગળ વધતા જોવા મળે છે, જ્યારે પોલીસકર્મીઓ પાછળ હટતા દેખાય છે.

વીડિયો પર લખેલું લખાણ આ મુજબ છે: હવે, જંતર-મંતર પર થશે હવે અસલી ખેલ

આ જ દાવો ઇન્સ્ટાગ્રામ પર પણ શેર કરવામાં આવ્યો હતો. આ દાવો એવા સમયે વાયરલ થયો જ્યારે કોકરોચ જનતા પાર્ટી (CJP) ના નેતૃત્વમાં હજારો વિરોધકર્તાઓ શિક્ષણ મંત્રીના રાજીનામાની માંગ સાથે નવી દિલ્હીમાં રસ્તા પર ઉતર્યાં હતા અને મંત્રીનું રાજીનામું લેવાઇ ગયું છે.

આ આંદોલન રાષ્ટ્રીય સ્તરની પરીક્ષાઓમાં થયેલી અનિયમિતતાઓના વિરોધમાં શરૂ કરવામાં આવ્યું હતું. તેમાં મુખ્ય મુદ્દાઓમાં મેડિકલ પ્રવેશ પરીક્ષાનું પ્રશ્નપત્ર લીક થયું હતું. જેના કારણે લાખો વિદ્યાર્થીઓએ ફરીથી પરીક્ષા આપવી પડી હતી અને ઓનલાઇન મૂલ્યાંકન પ્રણાલીમાં ખામીઓનો સમાવેશ થતો હતો.

વડાપ્રધાન મોદીએ પરીક્ષાના પેપર લીક કરવા માટે જવાબદાર લોકો સામે કડક કાર્યવાહી કરવાનું વચન આપ્યું છે. કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામા બાદ આંદોલનકારીઓએ 25 જુલાઈએ આ આંદોલન સમેટી લીધું હતું.

જો કે સોશિયલ મીડિયા પર એવા કેટલાક વીડિયો છે જેમાં નિહંગ શીખો વિરોધ પ્રદર્શનોમાં ભાગ લેતા જોવા મળે છે, પરંતુ વાયરલ થયેલો વીડિયો દિલ્હીના વિરોધ પ્રદર્શન સાથે સંબંધિત નથી.

વાયરલ વીડિયોના એક કી-ફ્રેમ પર ગૂગલ રિવર્સ ઈમેજ સર્ચ કરવાથી GUJARATPOSTને DailyPost TVના ફેસબુક પેજ પર 25 જૂન, 2026ના રોજ અપલોડ કરાયેલો આશરે 8 કલાક લાંબો લાઈવ વીડિયો મળ્યો, જેમાં સમાન દ્રશ્યો જોવા મળે છે.

વીડિયોના પંજાબી કેપ્શન મુજબ, તેમાં નિહંગ શીખો દ્વારા ઉત્તરાખંડ તરફ કરવામાં આવતી કૂચ દર્શાવવામાં આવી છે. સ્થાનિક મીડિયા અહેવાલો અનુસાર, હોટેલ સંચાલક સાથે વાહન પાર્કિંગને લઈને થયેલા વિવાદ બાદ ઉત્તરાખંડ પોલીસે ચાર નિહંગ શીખોની ધરપકડ કરી હતી. વાયરલ વીડિયોમાં દેખાતું જૂથ તેમની મુક્તિની માંગ કરવા માટે પોલીસ સ્ટેશન તરફ કૂચ કરી રહ્યું હતું.

અહેવાલોમાં એવું પણ જણાવાયું છે કે પોલીસે હિમાચલ પ્રદેશ-ઉત્તરાખંડ સરહદ નજીક કુલહાલ નગરમાં બેરિકેડ્સ (અવરોધક) મૂક્યા હતા, જેને નિહંગ શીખોએ તોડીને આગળ વધવાનો પ્રયાસ કર્યો હતો. સમાચાર અહેવાલોમાં આપવામાં આવેલી વિગતોના આધારે GUJARATPOST એ ગૂગલ મેપ્સ સ્ટ્રીટ વ્યૂની તસવીરો સાથે સરખામણી કરી અને પુષ્ટિ કરી કે વાયરલ થયેલો વીડિયો ખરેખર કુલ્હાલનો જ છે.