ધારાસભ્ય ધવલસિંહ ઝાલાની માંગ, બાયડ તાલુકામાંથી સાઠંબાને અલગ કરવા CM ને લખ્યો પત્ર- Gujarat Post

Published By
gujaratpost.in
2023-02-02 18:10:57

(ધવલસિંહ ઝાલાએ લખેલો પત્ર)

અરવલ્લીઃ બાયડના ધારાસભ્ય ધવલસિંહ ઝાલાએ સાઠંબાને અલગ તાલુકોનો દરજ્જો આપવાની માંગ સાથે મુખ્યમંત્રી ભૂપેન્દ્ર પટેલને પત્ર લખ્યો છે. જેમાં તેમણે અરવલ્લી જિલ્લાના બાયડ તાલુકામાંથી સાઠંબાને અલગ કરવાની માગણી કરી છે.

ધવલસિંહ ઝાલાએ પત્રમાં લખ્યું છે કે બાયડ તાલુકાનો વિસ્તાર ખૂબ જ મોટો હોવાથી ખેડૂતોને પોતાના કામ માટે લાંબા અંતરને કારણે વારંવાર ધક્કા ખાવા પડે છે. બાયડ તાલુકાનો વિસ્તાર અને વસ્તી વધારે હોવાને કારણે કામના ભારણમાં પહોંચી શકાય તેમ નથી.જો બાયડ તાલુકામાંથી નવા તાલુકા તરીકે સાઠંબાને માન્યતા આપવામાં આવે તો નાગરિકોને તેનો ફાયદો મળી રહેશે. તેમજ વિકાસ માટેની કામગીરી સરળતાથી થઈ શકશે.

ડિસેમ્બર 2022માં યોજાયેલી ગુજરાત વિધાનસભા ચૂંટણીમાં ધવલસિંહ ઝાલા બાયડથી અપક્ષ તરીકે ચૂંટાઈ આવ્યાં હતા. આ ચૂંટણીમાં ભાજપને ઐતિહાસિક 156, કોંગ્રેસને 17, આમ આદમી પાર્ટીને 5 સીટ મળી હતી.