મારી બોડી ઘરે આવે ત્યારે મને ગળે લગાડી લેજો...બેન્કમાં ફરજ બજાવતી યુવતીએ કર્યો આપઘાત

Published By Dilip patel
2025-07-18 17:53:13

અમરેલીઃ ખાંભા તાલુકામાં બેન્કમાં ફરજ દરમિયાન યુવતીએ ઝેરી દવા ગટગટાવીને આપઘાત કર્યો છે. આ પગલું ભરતા પહેલા તેને એક સ્યૂસાઇડ નોટ લખી હતી. દીકરીના મોતથી પરિવનારમાં માતમ છવાયો છે. આ મામલે પોલીસને મળેલી સ્યૂસાઇડ નોટમાં લાખો રૂપિયાનું દેવું થઈ જવાના કારણે આ પગલું ભર્યું હોવાનો ઉલ્લેખ છે.

ખાંભા તાલુકામાં ભાડ ગામની રહેવાસી ભૂમિકા હરેશભાઈ સોરઠિયા ખાંભા સ્થિત એક ખાનગી બેન્કમાં નોકરી કરતી હતી. તેને 28 લાખ રૂપિયાનું દેવું થઇ જતા આ પગલું ભર્યું હતું. સ્યૂસાઇડ નોટમાં લખ્યું હતું કે, તે 28 લાખ રૂપિયાના દેવાના બોજ નીચે દબાઈ ગઈ હતી, અને આ દેવું Shine.com નામની કંપની સાથે સંકળાયેલું હતું. નોટમાં પોતાના માતા-પિતાને સંબોધીને લખ્યું છે કે, મૃત્યું બાદ માતા-પિતાને 5 લાખ રૂપિયા પણ મળશે, આ સાથે PFના રૂપિયા પણ પડ્યાં હશે, તે પણ નીકાળી લેજો. ભૂમિકાએ તેની છેલ્લી ઈચ્છા પણ વ્યક્ત કરી હતી કે, મારી બોડી ઘરે આવે ત્યારે મને ગળે લગાડી લેજો. પ્લીઝ મારી છેલ્લી ઈચ્છા પૂરી કરી દેજો. હાલ આ મામલે ખાંભા પોલીસે નોટને આધારે તપાસ હાથ ધરી છે.

પ્રાથમિક તપાસમાં જાણવા મળ્યું છે કે, ભૂમિકા ઓનલાઈન જોબ પોર્ટલ Shine.com સાથે જોડાયેલી હતી, જેને કારણે તેના પર 28 લાખ રૂપિયાનું દેવું થયું હોવાનું બહાર આવ્યું છે. પોલીસ હવે આ દિશામાં તપાસ કરી રહી છે. દીકરીના મોતથી પરિવાર પર આભ તૂટી પડ્યું છે.